Topaketa: Aske eta disidenteak Iparraldetik eta Hegoaldetik

Topaketa honen helburua Gipuzkoako eta Oaxacako (Mexiko) gizarte-erakundeen arteko esperientzia-trukea, elkarrizketa eta hausnarketa sustatzea da, emakumeen, LGTBIQ+ pertsonen eta ingurumenaren eskubideen aldeko borroketan izandako esperientziak partekatuz.

Azaroaren 3an, 17:00etan, Nazioarteko Elkartasuna-Solidaridad Internacional erakundeak antolatutako tailerra egingo da, Irungo Udalaren LGBTIQ+ jarduera-programaren barruan.

Tailerra Nazioarteko Elkartasuna Solidaridad Internacional erakundeak Mexikoko Oaxacan babesten dituen ekintzen barruan kokatzen da. MATLA (Mujeres Articulando Territorio y Libertad) eta Lugar Común erakundeek gidatzen duten eta Gipuzkoako Foru Aldundiak finantzatzen duen proiektuaren helburua da Mexikoko Oaxaca estatuan emakumeen eskubideen defentsan eta sustapenean laguntzea, eta, zehazki, emakumeen antolakuntza- eta eragin-gaitasunak indartzea, honako eskubide hauek defendatzeko: i) indarkeria matxistarik, klasistarik, arrazistarik eta LGTBIfobikorik gabeko bizitza izateko eskubidea; eta ii) ingurumen jasangarri batean bizitzeko eskubidea.

Ekintzen eragina ahalik eta handiena izan dadin, Ipar Globaleko eta Hego Globaleko erakundeen artean helburu komunak partekatzen baitituzte, sentsibilizazio-jarduerak egiten dira Gipuzkoako eta Mexikoko elkarteen artean sareak ehuntzeko eta borroka feministaren, LGTBIQ+ mugimenduaren eta ingurumenaren aldeko borrokaren testuingurua osatzen duten dinamika globalak hobeto ulertzen laguntzeko.

Ildo horretan, Irungo Emakumeen Etxean «Aske eta disidenteak Iparraldetik eta Hegoaldetik» tailerra egingo da. Alde batetik, «Aske eta Disidenteak» argazki-erakusketaren aurkezpen laburra egingo da. Erakusketa azaroaren 3tik 30era egongo da ikusgai, eta Oaxacako estatuko emakume lesbianen egoerari buruz hausnartzera gonbidatzen ditu herritarrak.

Bestetik, MATLA eta Lugar Común erakundeek garatutako «Construyendo autonomía para las mujeres y acceso a una vida libre de violencia machista, clasista, racista, lgbtfóbica, o derivada de la crisis medioambiental en Oaxaca, México» proiektuko emakume liderrek beren tokiko ekimenen aurkezpena egingo dute online. Besteak beste, «la Semillera» prestakuntza-prozesu feminista, laguntza psikologikoko lanak, indarkeriaren biktimei arreta emateko lehen lerroko langileekin egindako lana, eta ingurumenaren eta hilekoaren osasunaren arloko eragin politikorako ekintzak nabarmenduko dituzte.

Horrez gain, ekitaldian Amanda Santos de Oliveira (aurrez aurre) eta Maite Irazabal (online) izango ditugu. Abarka GKEa eta Steilas sindikatua ordezkatuz, aurtengo otsailean proiektua bisitatu zuten, eta hainbat topaketatan parte hartu zuten Oaxacan emakumeen, LGTBIQ+ pertsonen eta ingurumenaren eskubideen aldeko ekimenak bultzatzen dituen sareko gizarte zibileko erakundeekin.

Amandak eta Maitek beren esperientzia partekatuko dute elkarteekin, eta Mexikora egindako bisitan lantzen hasi zen eztabaidetako bat mahai gainean jarriko dute. Gainera, bertaratutako Gipuzkoako elkarteekin gai horri buruz sakontzeko aukera izango dugu: nola antolatu nazioarteko lankidetza borroka feministetan kolonialitatea berriz ez erreproduzitzeko?

Euskal gizartea gero eta pluralagoa den honetan, Latinoamerikako eta Hego Globaleko ekimenei balioa ematea ez da sistema desorekatu batean harreman horizontalagoak sustatzeko ahalegina soilik; lurraldean diharduten eragileek landu beharreko funtsezko gai ere bada. Are gehiago, kontserbadurismoa aurrera egiten ari den eta emakume defendatzaileen eta kolektibo zaurgarrienen aurkako indarkeria areagotzen ari den testuinguru honetan.

Horregatik, Gipuzkoako elkarteen parte-hartzea eta komunitatean parte hartzen duten herritar interesdunen ekarpena benetan baliotsuak dira emakumeen eta LGTBIQ+ pertsonen eskubideen defentsaren aldeko sareak sendotzeko, baita ingurumenaren defentsaren aldekoak ere.