Zirkonioa gaur egun material estrategikoa da. Lurrazalean naturalki presente dago eta erauzteko itsasertzeko areak ustiatu behar dira.
Ezaugarri bakanak ditu, hala nola korrosioari erresistentzia, egonkortasun termikoa, gogortasuna, neutroien xurgapen txikia, eroankortasun termino txikia, hausturari erresistentzia handia eta inertzia kimikoa, horregatik hainbat industria-erabilpenerako bereziki baliotsua da eta munduko eskaera asko areagotu da.
2004an, Senegaleko estatuak Australiako Mineral Deposits Limited enpresari Grande Côte eskualdean zirkonioa, ilmenita, rutiloa, leukoxeno eta beste mineral batzuen meatzaritza-ustiapenerako emakida egin zion. 2007an, indar ekonomikoa egiaztatu ondoren, emakida 25 urtez luzatu zuten eta Senegaleko estatuak % 10eko onurak jasotzen ditu. Gaur egun, 2025ean, Grande Côte Operations (GCO) proiektua bere osotasunean Eramet multinazional frantsesaren jabegokoa da.
GCO meatzaritza-ustiapena kostaldean aurrera egiten dabil, Thiès eskualdetik Louga eskualderantz. Niayesak dauden kostaldeko zerrenda 180 km-ko luzerako ekosistema berezia da eta Senegalen landatzen diren barazki freskoen % 80 bertan ekoizten dira.
Fase bakoitzak ingurumenarentzat arrisku bereziak dakartza. Baina uraren erauzketa masiboa, paisaiaren eraldaketa eta biodibertsitatearen galera eskualdeko ingurumenaren iraunkortasunerako mehatxu larria dira. Niayeseko ekosistementzat bereziki larriak dira, haien indarberritze-ahalmena arriskuan egon baitaiteke. Gainera, meatzaritza-jarduerari eusteko akuifero sakonekiko mendekotasuna jasanezina da epe luzera.
